過年

【文、圖∕徐貴榮∕國立中央大學客家語文暨社會科學學系兼任助理教授】

 

　　一年透尾，梅花謝忒櫻花開，立春邊欸，年又到吔！

　　十二月廿四送灶公爺上天過後，廿五就入年架吔！正式落年个框仔，開始拚掃，除舊佈新，無麼个禁忌，「三十暗晡个尿桶－盡拚」，同屋下，拚到淨淨利利。貼堂號、對仔、門紅（圖1）、安太歲，同屋下打扮到新新新！

圖1 堂號、對仔、門紅（拍攝地點：三義雙潭村，時間：2017.5.11）

　　人講：「年到二十七，過年伸三日。」開始買年貨，打粄仔，蒸甜粄、發粄、蘿蔔粄這兜，較功夫个還有打肉粄、假柿仔（圖2）、發包仔、油錐仔（圖3），北部客人還愛打菜包，菜包捏來像元寶，講年三十日食菜包，過忒年會順序賺大錢。

　　年三十日，差毋多係歸日仔拜神，從打早開始敬天公、神明、伯公，阿公婆，到臨暗仔敬地基祖、床公婆，一日無閒洎杈。放到神桌頂拜个東西，包括甜粄、發粄、糖仔、果子，總下做毋得食，愛等到年初五出年架正做得收起來。愛過年欸！在外背做頭路、讀書个人，毋管路頭有幾遠，大家就愛轉年團圓。三十暗晡个飯甑、砧枋全無閒，阿姆煮到一豐豐沛沛，家人食到歡歡喜喜。團圓飯就愛有一樣長年菜，講食長年菜會年年有伸，青春壽年長。食飽分矺年錢，係細人仔盡想望个時節，逐儕都頭望望仔看爺哀分幾多錢？當然，又乜愛分老人家矺年錢，故所「三十暗晡个紅包，細人歡喜大人愁。」也有講「多子好耕田，少子好過年。」毋管仰般！一家老嫩大細都有錢好矺，心肝肚紮實紮實，發个夢都係甜个、會笑个；半夜較大个紙炮仔聲，聽起來又乜係恁快樂、歡喜个。

圖2 假柿仔（拍攝地點：桃園楊梅，時間：2019.4.17）

　　年初一麼个就愛尞，「人係無尞，一年就會做死。」連年初一个飯菜，年三十暗晡就愛煮好。這日做毋得做事，做毋得講無吉祥个話，做毋得睡當晝，睡當晝就會崩田崁。故所，當多人年初一愛出去行春，遶尞遶尞，看看啊光景；抑係去隔壁鄰舍、親戚朋友个打嘴鼓；還有人會去廟項燒香拜神、點光明燈、拜斗，求過忒年平安康健、順序賺錢。

　　年初二帶等雞髀、兩罐酒、等路，歡歡喜喜轉妹家。丈人哀煮到到豐豐沛沛，請婿郎、妹仔、孫仔這兜食到嘛細嘛洗。故所講：「初一食日齋，初二油濟濟」。過忒年初二，初三送窮鬼，初四接財神，初五出年架，年就走到八十西天去了唷！所有矺年个東西，總下愛收起來！現代人就愛開業做生理，上工作頭路。

　　年初五過後，天時還異寒，頭擺个農業社會，一般人還係「有食無食，食到年初十；有過無過，尞到月半過。」心肝肚還在該過年，一直愛尞到正月半正甘願。毋過，無錢个人就衰過咧！「年毋成年，節毋成節。」「年到初三四，各人打主意；年到初五六，無酒又無肉；年到初七八，家家捋粥缽。」煞煞愛尋事做哩！

圖3 油錐仔（拍攝地點：苗栗竹南，時間：2010.2.13）

　　今年2020鼠年特別早到，吂立春，新曆一月廿五就年初一吔！望得新个一年，大家都康康健健、平平安安、順順序序、快快樂樂！

徐貴榮教授 聲檔 — 過年（四縣腔）





　

▲BACK